DARLLEN - Amcanion a Bwriadau
_{______________________________________}

Mewn byd lle mae llythrennedd yn holl-bwysig, a statws pobl mewn galwedigaeth ac o fewn cymdeithas yn ddibynnol ar ei feistroli, mae'r ysgol hon yn cydnabod ei chyfrifoldeb tuag at feithrin plant sy'n gallu darllen ac sy'n awyddus i ddarllen.

At hynny rydym yn sylweddoli mai'r gallu i ddarllen yw'r allwedd i'r drws ym mhob agwedd o'r Cwricwlwm, a'i fod yn galluogi plant i gasglu gwybodaeth, ac i ddyfnhau eu dealltwriaeth.

Ysgol fydd hon, felly, fydd yn gyson annog plant i ymbleseru mewn byd llyfrau - boed y llyfrau hynny yn ffuglen neu'n ffeithiol. Golyga hyn y bydd llyfrau amrywiol, cyfoes ac apelgar yn rhan o adnoddau pob dosbarth, a'r llyfrau hynny yn cael eu harddangos yn chwaethus a'u defnyddio yn bwrpasol.

      
Plant Ifanc

Yn nosbarthiadau'r plant bach byddwn yn barod i adeiladu ar brofiad cyn-ysgol y plant, i feithrin parch at lyfrau ac i arddangos enghreifftiau o'r gais ysgrifenedig ar furiau'r dosbarth.

O safbwynt y deunyddiau bydd pwyslais amlwg ar yr elfen storļol, a chyfleoedd i'r plant uniaethu ā chymeriadau eu llyfrau darllen. Fe all mai ar ffurf cyfresi/cynlluniau darllen y bydd llawer o'r llyfrau cynnar, ond fe fyddant yn cynnwys storļau gwerth-eu-dweud a gwerth-eu-clywed. Bydd llawer o'r deunydd gorau i'w weld yn y toreth o lyfrau sy'n cael eu cyhoeddi y dyddiau hyn. Bydd y sylw a roddir i hwiangerddi a chaneuon, i storļau o waith y plant eu hunain ac i adnoddau darllen-a-gwrando yn gymorth i blant gael y gynhysgaeth lawn o ddeunydd pwrpasol. Yn ogystal ā'r deunydd mewn llyfrau bydd plant yn dod i weld print ar sgrin cyfrifiadur. Bydd yr adnoddau hyn oll yn cael eu darparu yn y Gymraeg a'r Saesneg, ac fe ystyriwn y gall oedolion eraill gael eu gwahodd i'r dosbarth i hybu ac annog y plant yn eu gweithgareddau darllen.

       
Plant Hyn

Fel y bydd y plant yn datblygu ac aeddfedu fe fyddwn yn eu hannog i agor y drws yn lletach o dipyn i beth, fel y cānt fwy o brofiadau amrywiol. Bydd y llyfrau o'u cwmpas yn ehangach eu hystod ac yn fwy amrywiol eu cynnwys. Byddwn yn eu hyfforddi i ddefnyddio llyfrgell-gyfair yr ysgol yn arbennig trwy eu cynefino ā thechnegau llyfrau ffeithiol fel y gallant feistroli'r uwch-sgiliau darllen. Trwy hyn fe fyddant yn lledu gorwelion eu darllen ac yn hwyluso'r ffordd i well dealltwriaeth o wahanol destunau - rhai ohonynt yn codi o themāu'r dosbarth, eraill yn codi o'u diddordebau hwy eu hunain.

Byddwn yn eu hannog i drafod eu llyfrau, o safbwynt plot a chymeriad stori, arddull awduron, ac ambell dro byddant yn ysgrifennu adolygiad i annog plant eraill i ddarllen y llyfrau.

Er mai darllen yn ddistaw, gan fewnoli ystyr y print, y byddwn ni oedolion, bydd yn ofynnol i blant ddangos cynnydd yn eu rhuglder trwy 'ddarllen yn uchel'. Byddant hefyd yn cael cyfleoedd i ddarllen yn gyhoeddus e.e. wrth baratoi at wasanaeth boreol, wrth gyflwyno hoff ddarn o farddoniaeth ac wrth ddarllen deialogau o'u gwaith eu hunain.

Ceisiwn annog y rhieni i ymddiddori yn ymdrechion plant a'u llyfrau, a byddwn innau fel athrawon yn 'gwneud ffys' o'r llyfrau a ddygir o'r cartrefi i'r ysgol.