Ysgrifennu
YMATEB I WAITH YSGRIFENNU PLANT
_{______________________________________}

Oherwydd fod plant yn treulio cyfran helaeth o'u hamser yn yr ysgol yn ysgrifennu, a hynny fel arfer er mwyn i ni fel athrawon ymateb iddo, fe ddylem ystyried beth yn union sy'n llywio'n dulliau ni o ymateb.

Ydym ni, er enghraifft, yn ymateb trwy farcio, trwy gywiro, trwy awgrymu gwelliannau, ynteu trwy wneud pob un o'r rhain?

Oes yna gysondeb yn y ffordd y mae holl athrawon yr ysgol yn ymateb?

Canllawiau

1. Dylai'r ffordd yr ydym yn ymateb ddibynnu ar:

(a) natur y dasg a osodwyd
Os mai ysgrifennu stori oedd y dasg dyla'i ymateb cyntaf fod i lwyddiant y stori ac nid i sillafu ac atalnodi!

(b) cyrhaeddiad y plentyn
Os oes llawer iawn o wallau yng ngwaith y plentyn dylem ymatal rhag tynnu sylw at y rhan fwyaf ohonynt

2. Dylai'r ymateb fod yn bositif, yn gweld gwerth yn ymdrechion y plentyn, ac yn ceisio adeiladu arnynt.

3. Ambell dro bydd sylw llafar yn ddigonol, dro arall bydd angen sylw ysgrifenedig, - a hwnnw yn sylw sy'n dangos fod yr athro/athrawes wedi darllen y darn yn hytrach nag wedi canfod y gwallau!

4. Mae rhoi marc e.e. 6/10 yn annigonol os nad oes hefyd sylw gydag ef sy'n awgrymu pam 6/10, a sut y gellir ennill 8/10. Wrth gofnodi sylw fel hyn gellir gwerthfawrogi'r ymdrech ac awgrymu sut i wella'r darn.

e.e

Byddai'r darn yn llawer mwy llwyddiannus pe byddai llai o oedi i ddisgrifio'r hen ddyn.

Darn addawol iawn. Efallai y byddai brawddegau cryfach i agor a chloi yn ei wneud yn fwy effeithiol?

Go dda ti. Ond mae 2 air yn yr 8fed llinell a 2 air yn yr 12fed llinell wedi'u camsillafu. Pa rai, tybed?

5. Mae rhai gwallau yn fwy difrifol na rhai eraill. Er enghraifft, gellir dadlau fod cystrawen anghywir (e.e. am bod mae hi'n braf) yn llawer mwy difrifol na methu dyblu 'n' neu gam-sillafiad arall. Dylid ystyried pa wallau i dynnu sylw'r plentyn atynt, felly, yn arbennig os yw'n blentyn sy'n wallus iawn ei fynegiant.

Mathau o wallau/wendidau