Anghenfil metel 25 tunnell yw’r Robosaurus ac mae ei chwant am fwyd yn aruthrol. A dweud y gwir mae’n gwneud i’r Turannosaurus Rex ymddangos fel llysieuwr gan ei fod yn cael blas mawr ar geir o bob lliw a llun.

Pan mae’r Robosaurus eisiau bwyd mae’n cydio mewn car a’i godi at ei geg fetel anferth. Ar ôl coginio’r pryd bwyd trwy chwythu fflam chwe metr o’i drwyn mae’n barod i ddefnyddio’i ddannedd miniog i gnoi…a chnoi.

Yng Nghaliffornia – ble arall? – y cafodd y bwystfil taircoes ei greu a hynny gan beiriannwr o’r enw Doug Malewicki.

Lluniau ar bapur a model pren oedd y man cychwyn a, diolch byth, mae’r cyfan dan reolaeth y peilot a’r cyd-beilot sy’n gweithio pwlïau a’r lifrau sydd mewn caban arbennig ym mhen y Robosaurus.

Ond mae hyd yn oed Doug yn cyfaddef ei fod weithiau’n teimlo’n nerfus ynghylch grym ei ddyfais. Dyma’i eiriau: "Pan dw i’n ei weld yn cnoi car yn ei hanner, yn rhwygo’r to i ffwrdd a’i grensian yn ddim, dw i’n meddwl beth oedd yn fy mhen i’n creu’r fath fwystfil."

Mae’r Robosaurus yn dangos ei sgiliau mewn sioeau ceir a ffeiriau ar hyd a lled America. Mae pob perfformiad yn costio £15,000 ond rhan fach iawn yw hynny o’r £1 miliwn a gostiodd hi i adeiladu’r car-grensiwr cawraidd!

Allan o "Peiriannau Mega" gyda chaniatâd Gwasg Addysgol Cymru