Am y tro cyntaf erioed dim ond un tim pêl-droed sydd yn Ysgol Glanaber.  Mae’r Prifathro yn rhy brysur yn paratoi ar gyfer yr arolygwyr i hyfforddi ail dim.  Nid yw Arwyn wedi ei ddewis i chwarae i dim yr ysgol ond mae ei dad yn penderfynu ffurfio tim newydd sbon sef BMG Unedig.  Mae hwn yn dim arbennig iawn gan fod merched yn cael chwarae gyda’r bechgyn.  Os wyt yn meddwl fod hyn yn mynd i greu helynt - rwyt yn iawn, ac nid yw’r tywydd yn helpu dim!

Ar ddechrau'r stori hon mae hi’n oer, mae’n wlyb a thymor pêl-droed Cynghrair Cylch Caerddewi ond yn bum wythnos oed.   Dyma dymor cyntaf BMG Unedig yn y Gynghrair ac nid yw pethau yn mynd yn dda.  Un peth yw chwarae, peth arall yw ennill.  Mae BMG Unedig wedi chwarae pum gêm ac wedi colli pob un! O ganlyniad maent yn gorwedd ar waelod yr ail adran.  Dim syndod felly bod ysbryd y tim yn isel a bod tuedd gan y tim i gweryla ymysg ei gilydd.   Mae Robbie ac Angharad, ymosodwyr y tim, yn gwario mwy o amser yn ymosod ar ei gilydd na sgorio goliau yn erbyn timau eraill!

A ydynt yn dysgu cyd-dynnu a chredu eu bod yn ddigon da i ennill – rhaid cael copi o’r llyfr i ddarllen am yr hyn sydd yn digwydd i’r tim arbennig hwn.  Mae lluniau bywiog John Shackell yn ychwanegu at y cyffro yn y stori ac mae’r lluniau o’r digwyddiadau pwysig yn y gêmau yn rhai difyr iawn .

Dyma’r ail mewn gyfres o storiau am dim pêl-droed BMG. Y llyfrau eraill yw ‘Cic o’r Smotyn‘,   ‘Cyffro’r Cwpan’,  ‘Tacl Hwyr’ a  ‘Ar Ddiwedd y Dydd’.

Lluniau John Shackell

Cyhoeddwr:  Cymdeithas Lyfrau Ceredigion