Ydych chi erioed wedi dychmygu sut deimlad oedd hi i fyw yn ystod yr ail ryfel byd?  Efallai y bydd y llyfr yma o help wrth i ni ddilyn hynt a helynt Glyn a’i ffrindiau o Fethesda ar ddechrau’r rhyfel.  Mae bywyd yn newid yn sydyn iddynt ar ôl i nifer o ifaciwis symud i’r ardal.  Un ifaciwî oedd Freddie, "Sais ydi o, miss", cefnder Glyn o Birmingham.  Nid oedd am wneud ffrindiau gyda neb arall ond Glyn nac am siarad Cymraeg er ei fod yn deall ychydig.  Dilynwch ei helyntion yn ei ymdrech i gael ei yrru’n ôl adref.

Er iddo lwyddo, nid yw’n hir cyn fod rhaid iddo ddychwelyd i Fethesda, wrth i awyrennau’r gelyn fomio trefydd Lloegr.  Darllenwch y llyfr i ddarganfod sut mae Freddie yn teimlo erbyn hyn a sut y mae’n mynd ati i newid agwedd ffrindiau Glyn tuag ato.

Mae hon yn stori anturus, doniol a thrist i gyd yn un. Mae lluniau gwych Jac Jones ymhob pennod a nodiadau o bapurau a dyddiaduron o’r cyfnod yn ei gwneud yn stori realistig.