Does dim rhaid i chi fod yn giamstar ar y We i fwynhau’r stori hon o gwbl.  Mae Michael Coleman wedi 'sgwennu stori antur hynod o gyffrous o gwmpas gyrru a derbyn negeseuon e-bost rhwng ffrindiau hen a newydd, pell ac agos.  Mae Rob (sy’n galw ei hun yn ZMASTER) yn darganfod ei hun mewn perygl mawr yn ei gartref ei hun. Mae ganddo amser i yrru un e-bost yn unig a honno mewn côd.  Bydd rhaid i’w ffrindiau newydd, Tamsyn a Josh ddeall beth yn union mae :-(( ¬:-D :-V i-) yn ei olygu, ac wedyn rhaid ffeindio allan pwy yn union yw ZMASTER a lle mae o’n byw.  Mae’r stori dditectif yma wedi ei lleoli yn Efrog Newydd, Awstralia, Canada a Chaerdydd, a byddwch yn dal eich gwynt wrth i amser dician ymlaen wrth i Tamsyn a Josh ruthro i gael gafael yn yr holl ddarnau o wybodaeth a fydd yn eu harwain at y gwir. Stori dda a chyffrous ydi hon sydd yn gyntaf mewn cyfres.

Beth am ymweld â safle gwe Michael Coleman ei hunan, sef www.michael-coleman.com?