Bydd y nofel hon yn apelio fwyaf at enethod dybiwn i, yn enwedig y genethod hynny sy’n hoffi straeon anifeiliaid.  Mae Emily Huws wedi cynnwys llawer o wybodaeth ddefnyddiol a ffeithiau am edrych ar ôl cathod, ond mae wedi creu hefyd, stori ddifyr iawn gyda dirgelwch yn perthyn iddi.  Mae Zöe yn achub cath fach o’r afon, ac mae’n dychryn wrth sylweddoli bod rhywun creulon wedi cau’r gath mewn bocs a’c wedi ei thaflu i’r dwr er mwyn cael gwared ohoni.  Mae dirgelwch arall hefyd: pwy yw AAA (Anghenion Anifeiliaid Anwes) sy’n hysbysebu yn y papur newydd, a pham eu bod yn gofyn am gathod bach?  A pham hefyd nad yw Melanie, y ferch newydd yn yr ysgol, yn edrych fel pe bai yn nabod ei henw?  Oes ganddi hi gyfrinach mae’n ceisio ei gadw rhag Zöe?  Mae Zöe yn benderfynol o ddod o hyd i’r atebion, ond nid yw’n barod am yr hyn sy’n digwydd ar ddiwedd y nofel chwaith!  Mae hon yn nofel sy’n darllen yn eitha hawdd, ac roeddwn yn hoffi’r elfennau o ddirgelwch sy’n plethu trwy’r stori.