Mae'n hanfodol magu perthynas dda gyda rhieni. Mae cysylltiad agos rhwng y cartref â'r ysgol yn allweddol bwysig er lles y plant. Mae perthynas iach ac adeiladol yn cynorthwyo'r plant i ymgartrefu'n hapus yn yr ysgol. Man cychwyn y daith addysgol yw'r plentyn a'i anghenion unigol. Yn y cyswllt hwn mae lle i gydweithio yn agos gyda rhieni er mwyn ennyn diddordeb yn yr hyn y mae eu plant yn ei wneud a sicrhau cefnogaeth yn eu datblygiad.

Awgrymir cynnal a threfnu’r gweithgareddau isod fel bo’n briodol:

• Trefnu cyfarfod gyda rhieni i egluro yr hyn y gobeithir ei gyflawni o safbwynt cyflwyno’r Gymraeg i'w plant ac esbonio dull yr ysgol o ddiogelu a datblygu’r Saesneg. Gellir trafod y modd y gall y rhieni helpu er eu bod yn ddi-Gymraeg.

• Ail gyfarfod gyda'r rhieni i'w hyfforddi (cynnal gweithdy) ar sut i helpu'r plant fydd yn cyd-fynd â phrif weithgareddau 'Cymraeg' sy'n deillio o'u gwaith e.e. gweithgareddau 1 a 2.

• Creu taflen i rieni (gellir ei rhoi ar hysbysfwrdd y dosbarth meithrin) a gofyn iddynt ganolbwyntio ar ddau batrwm gyda'u plant am wythnos / pythefnos e.e. Tynna dy gôt / Gwisga dy gôt / Diolch / Dim diolch.

• Creu taflenni a thâp o'r hwiangerddi / caneuon y bydd y plant yn eu dysgu yn ystod y tymor. Gellir gwneud hyn hefyd gyda phenillion a chaneuon / carolau ar gyfer y Nadolig.

• Creu tapiau o'r llyfrau mawr a grewyd gyda'r plant. (Bydd angen gwneud llyfrau bach hawdd eu trin o'r rhain). Creu taflenni i egluro y storïau - ystyr geiriau /ynganu etc.

• Creu tapiau neu brynu tapiau i gyd fynd â llyfrau storïau'r dosbarth e,e, 'Dðr', 'Bili Broga', 'Helpwch fi' (Cynllun 3D). fel y gellir eu hanfon gartref gyda’r llyfr.

• Annog rhieni i wylio rhaglenni teledu gyda’u plant e.e. Slot Meithrin, Planed Plant.