Yn y prosiect hwn fe ddatblygir llythrennedd ar draws y Cwricwlwm.  Ym mhrosiect Ysgol Gwenffrwd  fe hyrwyddir y defnydd o'r eirfa a'r iaith a berthyn i faes Daearyddiaeth, ac yn benodol y termau sy'n gysylltiedig â'r afon a'i chyffiniau. Manteisiwyd ar y cyfle i gyflwyno geirfa newydd i'r disgyblion ynghyd â sgiliau caffael a dod o hyd i wybodaeth o wahanol ffynonellau,  e.e. llyfrau, y We a CDromau.  Yn sgìl hyn fe ddatblygwyd sgiliau llithr ddarllen a chip - ddarllen, cyflwyno'r wybodaeth a gasglwyd yn glir ar lafar, neu trwy gofnodi'r prif bwyntiau ar ffurf nodiadau. Atgyfnerthwyd yr eirfa yn ddiweddarach trwy weithgareddau dawns, celf a cherdd, fel bo'r disgyblion yn ei defnyddio’n hyderus.

Ym mhrosiect Ysgol Terrig fe gyflwynir llythrennedd trwy Wyddoniaeth. Ymdrinnir a gwybodaeth ffeithiol am greaduriaid. Wrth osod yr wybodaeth ar dudalennau’r We fe gafwyd cyfle i ail ymweld ac atgyfnerthu'r iaith wyddonol sydd yn gysylltiedig â'r thema.  Wrth gynllunio’r  gweithgareddau fe grewyd cyd-destun a ganiatâi ddefnydd pwrpasol o’r iaith, gyda’r trafod wrth y cyfrifiadur yn gyfrwng i’w atgyfnerthu.  Wrth gynnal y gwaith fe welwyd y disgyblion yn elwa o gyfleoedd i holi ac i gynnig sylwadau’n glir,  i fynegi barn ac i ddatblygu eu syniadau a’u dealltwriaeth.

Er mai prif ffocws  y prosiect yn y ddwy ysgol arall, sef Maes Garmon a Glanrafon oedd rhifedd, roedd cyfle yma hefyd i ddatblygu sgiliau iaith a llythrennedd trwy drafod creaduriaid y pwll dwr, cynllunio’r gweithgareddau,  trafod a gosod tudalennau’r wefan, yn ogystal ag ymarfer sgiliau trawsieithu wrth drosi gwybodaeth o'r Saesneg i'r Gymraeg.