Gweithgareddau Cynhesu

Canllawiau Proffesiynol

... gwybodaeth ynglyn ag arfer dda, digwyddiadau, prosiectau a defnyddiau newydd.

CYNLLUNIO A THREFNIADAETH: MATHEMATEG PEN
_{____________________________________________________________________________}

Gweithgareddau ‘cynhesu’ ar gyfer y 10 munud agoriadol

1. ‘3.. 2.. 1.. Dangoswch’

Bydd angen pac o gardiau wedi’u marcio 0 i 9 ar gyfer pob plentyn a’r athro. Mae’r athro yn dewis rhif heb ei ddangos i’r plant ac yn gwneud datganiad am y rhif fel a ganlyn :

Dwbl fy rhif yw 16.
Mae fy rhif adio 9 yn gwneud 17.
Hanner fy rhif yw 4.
Mae fy rhif yn draean o 24.

Wedyn gofynnwch i’r plant ‘Beth yw fy rhif ?’ Rhaid sicrhau bod pob ateb yn 1-digid. Mae’r plant yn cyfrifo’r ateb ac yn dewis y cerdyn priodol heb ei ddangos i’r plant eraill. Ar yr arwydd ‘3.. 2.. 1.. dangoswch’ mae pawb, gan gynnwys yr athro yn dangos eu cardiau.

2. Curo’r Cloc

Bydd angen darn o bapur a phensel ar gyfer pob plentyn. Dewiswch dabl lluosi i’w ymarfer. Mae’r plant yn cael 1 munud yn erbyn y cloc i ysgrifennu atebion y tabl gan nodi’r ateb olaf pan ddaw’r amser i ben. Dyma eu targed ar gyfer y munud nesaf. Rhaid troi’r papur drosodd cyn ail-wneud y dasg.

3. Cardiau Saeth

Bydd angen set o gardiau saeth ar gyfer pob plentyn wedi’u gosod allan ar y bwrdd mewn trefn.

Rhowch gyfarwyddiadau i’r plant fel y ganlyn :

Dangoswch 23.
Dangoswch 120.
Dangoswch 137.
Dangoswch 305.
Dangoswch 155. Adiwch 10.
Dangoswch 247. Tynnwch 20.
Dangoswch 124. Beth sydd 50 yn fwy ?
Dangoswch 567. Beth sydd 100 yn llai ?
Dangoswch 545. Adiwch 20. Tynnwch 100. Adiwch 2. Beth yw’r ateb ?

4. Gwyntyllau

Bydd angen gwyntyll ar gyfer pob plentyn. Rhowch gyfarwyddiadau i’r plant fel y ganlyn :

Dangoswch ddau ddigid sydd yn rhoi cyfanswm o 15.
Dangoswch dri digid sydd yn rhoi cyfanswm o 12.
Dangoswch rif 2-ddigid sydd yn odrif.
Dangoswch rif 3-digid sydd yn eilrif.
Dangoswch rif 2-ddigid sydd rhwng 50 a 75.
Dangoswch rif 2-ddigid sydd yn lluosrif o 9.
Dangoswch rif 3-digid sydd yn lluosrif o 5.

5. Cardiau Dolen

Bydd angen set o gardiau gydag un cerdyn ar gyfer pawb yn y dosbarth gan gynnwys yr athro. Mae’r cardiau wedi eu marcio fel y ganlyn :

6 ydw i. 18 ydw i. 36 ydw i.
Adiwch 12. Dyblwch fi. Tynnwch 8.

Mae’r athro yn darllen ei gerdyn. Mae’r plant yn cyfrifo’r ateb gan chwilio trwy eu cardiau am yr ateb. Mae’r plentyn gyda’r ateb priodol yn darllen y cerdyn nesaf. Mae hyn yn parhau nes i bawb ddarllen eu cardiau. Rhaid i’r cerdyn olaf yn y ddolen rhoi’r ateb sydd ar gerdyn yr athro.

6. Y Sgwâr Lluosi

Rhowch sgwâr lluosi ar y bwrdd du neu ar ddalen fawr o bapur.

Dechreuwch gyda’r holl atebion ar y sgwâr. Ar ôl gofyn ychydig o gwestiynau, tynnwch yr atebion i ffwrdd (neu eu gorchuddio) fesul ychydig nes mae canol y sgwâr yn wag. Wedyn, pwyntiwch at y sgwariau gwag gan ofyn i’r plant rhoi’r atebion priodol.

7. Y Grid Gwag

Rhowch grid ar y bwrdd du neu ar ddarn mawr o bapur a’i lenwi gyda rhifau.

Gofynnwch gwestiynau i’r plant fel y ganlyn :

Beth yw cyfanswm y rhes cyntaf ?
Beth yw cyfanswm yr ail golofn ?
Beth yw cyfanswm y rhif lleiaf a’r rhif mwyaf ar y grid ?
Beth yw’r rhif 3-digid mwyaf posibl gan ddefnyddio’r digidau yn y rhes cyntaf ?
Beth yw lluoswm y rhif cyntaf yn y rhes cyntaf a’r rhif cyntaf yn yr ail res ?

Wedyn tynnwch y rhifau (neu eu gorchuddio) a gofyn yr un math o gwestiynau eto. Rhaid i’r plant geisio cofio’r rhifau gan ddelweddu’r grid llawn.

8. Newid Y Rhif

Rhannwch y plant yn grwpiau yn ôl eu gallu. Bydd angen pac o gardiau chwarae ar gyfer pob grp. Dewiswch weithrediad megis +9 neu x2 ar gyfer pob grp. Gosodwch y pac wyneb i lawr ar ganol y bwrdd. Mae’r plant yn cymryd tro i droi y cerdyn cyntaf drosodd a newid y rhif gan ddefnyddio’r weithred briodol (mae’r cardiau llun yn cyfrif fel 10). Mae’r grwpiau yn cystadlu yn erbyn ei gilydd. Mae’r tîm cyntaf i ‘newid’ eu cardiau i gyd yn ennill.

9. Targed

Bydd angen cardiau wedi’u labelu o 1 i 100, dis a chownteri. Gosodwch y plant mewn parau a rhannu un cerdyn i bob pâr. Taflwch y dis gan ddarllen y rhif yn uchel ( mae’n syniad da i ysgrifennu’r rhif ar y bwrdd du hefyd er mwyn gwirio cyfrifon y plant). Mae pob pâr yn adio’r rhif at y rhif ar eu cerdyn. Taflwch y dis. Y tro hwn, mae pob pâr yn adio’r rhif i’w cyfanswm newydd. Parhau gyda’r gêm. Bob tro mae pâr yn cyrraedd cyfanswm sydd yn gorffen gyda’r digid 0, maent yn gweiddi ‘Targed’ ac yn casglu cownter. Os ydy’r rhifau yn mynd yn rhy uchel, rhannwch gardiau newydd ac ail gychwyn. Y pâr gyda’r nifer fwyaf o gownteri ar ddiwedd y gêm sydd yn ennill.